ज़िला कलक्टर कू पौड़ी का सब्बि भोटरों तैं रंत रैबार

पहाड़ का सच,पौड़ी।

नमस्कार,

आप थैं मेरी तरपां बिटि सेवा सौंळी, उम्मीद छ कि आप सपरिवार स्वस्थ ह्वेल्या । आप जणदा छां कि आण वाळा 19 अप्रैल का दिन लोक सभा की भोटिंग को दिन छ । अर ये चुनौ मा अपणु भोट देकि एक बढ़िया अर विकास का काम करण वालि सरकार बणौन की जिम्मेदारी अब हम सब पर छ ।

आप सरकार का हर कार्यक्रम मा बढ़ी चढ़ी की भागीदारी करदा, अर आपन पैली बि अलग-अलग चुनौं मा भोट देकि भली सरकार बणौण मा अपणि जिम्मेदारी निभै छ। यांका वास्ता आप बधाई का पात्र छन। एैसु बि हमतै उम्मीद छ की आप अपणु भोट द्यूण का साथ ही अपणा परिवार अर आस-पड़ोस वाला तैं बि भोट द्यूण तैं प्रोत्साहित करला, ताकि सब मिली जुली तैं एक अच्छी सरकार बणौण मा अपणी भागीदारी निभै सको ।
आपकु लम्बु अर उत्तम स्वास्थ्य की कामना का दगड़ि, धन्यवाद।